އިލެކްޝަންސް ކޮމިޝަން (އީސީ) ގެ މެންބަރުކަމަށް އަބްދުލް ހަސީބު އިސްމާއިލް އައްޔަން ކުރުމަށް ރައްޔިތުންގެ މަޖިލީހުން ރުހުން ދީފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އީސީގެ މެންބަރުކަމަށް ހަސީބު އައްޔަން ކުރުމަށް ރުހުން ހޯދުމަށް ވަނީ ވޯޓަށް އަހާފަ އެވެ. މި ވޯޓުގައި 67 މެންބަރުން ވޯޓު ދެއްވާފައިވާ އިރު ހުރިހާ މެންބަރުންވެސް ވަނީ ހަސީބަށް ރުހުން ދިނުމަށް ވޯޓު ދެއްވާފަ އެވެ.
އީސީގެ މެންބަރު ކަމަށް ބޭފުޅަކު އައްޔަނު ކުރަނީ އެ ކޮމިޝަންގެ ރައީސްގެ މަގާމުގައި ހުންނެވި ފުއާދު ތައުފީގުގެ މެންބަރުކަން މިމަހު 24 އަށް ހަމަވާތީ އެވެ.
އީސީގެ މެންބަރުކަމަށް ކުރިމަތިލުމަށް ހުޅުވާލުމުން ކުރިމަތި ލެއްވި ބޭފުޅުންގެ ތެރެއިން މަގާމަށް ހަސީބު އައްޔަނު ކުރުމަށް ފެނިވަޑައިގަންނަވާތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އޭނާގެ ނަން މަޖިލީހަށް ފޮނުވާފަ އެވެ. އަދި މަގާމަށް ކުރިމަތި ލެއްވި އިތުރު ބޭފުޅުންގެ ނަންތައްވެސް ރައީސް މަޖިލީހަށް ފޮނުވާފައިވެ އެވެ.
މި މައްސަލަ ދިރާސާކޮށްފައިވަނީ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީންނެވެ.
