މޯލްޑިވްސް އިސްލާމިކް ބޭންކް (އެމް.އައި.ބީ)ގެ އޭ.ޓީ.އެމް ޚިދުމަތް 19 ރަށަކަށް ފުޅާކުރުމުގެ އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގައި ސޮއިކުރެއްވީ އިކޮނޮމިކް މިނިސްޓަރު މުޙައްމަދު ސައީދާއި އެމްއައިބީގެ ސީއީއޯ މުފައްދަލް އިދްރީސް ޚުމްރީއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގަތް މި ރަސްމިއްޔާތު ކުރިއަށް ގެންގޮސްފައިވަނީ މިއަދު މެންދުރު ރައީސް އޮފީހުގައެވެ.
މި ރަސްމިއްޔާތުގައި ވާހަކަދައްކަވަމުން އެމްއައިބީގެ ސީއީއޯ ވިދާޅުވީ، އެއްބަސްވުމުގެ ދަށުން 23 އެޓީއެމްއެއް ގާއިމުކުރާނެ ކަމަށެވެ.
އަންނަ އަހަރު ނިމޭއިރު 37 ރަށެއްގައި 62 އޭޓީއެމްއެއް ގާއިމުކުރާނެ ކަމަށާއި އޭގެތެރޭގައި 56 ރުފިޔާ އޭޓީއެމްތަކާއި ހަ ޑޮލަރު އޭޓީއެމް ހިމެނޭކަމަށް އޭނާ ވިދާޅުވެފައިވެއެވެ.
އެރަށްތަކުގެ އިތުރުން ވެސް އެހެން އޭޓީއެމްތައް ގާއިމުކުރަން މަސައްކަތް ކުރައްވާނެ ކަމަށާއި އެމްއައިބީގެ އޭޓީއެމްތަކުން އެކްސެސް ފީއެއް ނުކަނޑާނެ ކަމަށް އޭނާ ވިދާޅުވެފައިވެއެވެ.
އަދި، އެ ބެންކުގެ ޚިދުމަތްތައް ފުޅާކުރަން މަސައްކަތް ކުރައްވާނެކަން އެމްއައިބީގެ ސީއީއޯ ވަނީ ފާހަގަކުރައްވާފައެވެ.
