ލޯބިވެރިޔާގެ ބަރަހާނާ ފޮޓޯތަކާއި ވީޑިއޯތައް ލީކުކޮށްލާނެ ކަމަށް ބުނެ ބިރުދައްކައި އިންޒާރު ދިން މައްސަލައިގައި ފުލުހަކު ހައްޔަރު ކޮށްފިއެވެ.
ފުލުހުން މީޑިއާތަކަށް ފޮނުވި މެސެޖެއްގައި ވާ ގޮތުން އެމައްސަލައިގައި ކޯޓު އަމުރެއްގެ ދަށުން ހައްޔަރު ކޮށްފައިވަނީ އއ. މަތިވެރި ޕޮލިސް ސްޓޭޝަންގައި މަސައްކަތް ކުރަމުން އަންނަ އެރަށު، ފަޒާ، ޒައިދާން މުހައްމަދު (19އ) އެވެ. އޭނާއަކީ ރެކްރޫޓް ފުލުހެކެވެ.
ފުލުހުން ވިދާޅުވީ، އޭނާ ހައްޔަރުކޮށްފައިވަނީ އޭނާގެ ލޯބިވެރިޔާއަށް ބިރުދައްކައި، އޭނާގެ އޮތިޔާން މަންޒަރު ދައްކުވައިދޭ ފޮޓޯއާއި ވީޑިއޯ މީސްމީޑިއާގައި ލީކުކޮށްލާނެ ކަމަށް ބުނެ ބިރުދައްކައި، އިންޒާރުދީ، ބްލެކްމެއިލް ކުރި ކަމުގެ ތުހުމަތުގައި ކަމަށެވެ.
އެމައްސަލައިގައި އިއްޔެ އޭނާ ހައްޔަރުކޮށް، މަތިވެރި މެޖިސްޓްރޭޓް ކޯޓަށް ހާޒިރު ކުރުމުން 3 ދުވަހަށް ބަންދު ކުރުމަށް އަމުރުކޮށްފައިވާ ކަމަށާއި މައްސަލަ ތަހުގީގު ކުރަމުން އަންނަ ކަމަށް ފުލުހުން ވަނީ ވިދާޅުވެފައެވެ.
