މިއަދު ބޭއްވި ރަސްމިއްޔާތެއްގައި ޖަޕާން ސަރުކާރުގެ ފަރާތުން ފުލުހުންނަށް އުޅަނދުތައް ހަދިޔާކޮށްދެއްވީ އެ ގައުމުން ރާއްޖެއަށް ކަނޑައަޅާފައި ހުންނަވާ ސަފީރު އިޝިގާމީ ރުމީކޯއެވެ. އަދި ފުލުހުންގެ ފަރާތުން އުޅަނދުތަކާ ހަވާލުވެވަޑައިގެންނެވީ ޕޮލިސް ކޮމިޝަނާ އިސްމާއިލް ނަވީންނެވެ.
ފުލުހުންގެ އިދާރާއިން ވިދާޅުވީ ޖަޕާނުގެ ސަރުކާރުގެ ފަރާތުން ހަދިޔާކޮށްދެވީ ފަސް ލޯންޗް ކަމަށެވެ. އެ ލޯންޗްތަކުގައި ހުރީ ފުލުހުންގެ ލޯގޯ ޖަހާފައެވެ. އަދި އެ ހިދުމަތުގެ މަސައްކަތަށް ބޭނުންވާ ބައެއް އާލާތްތައް ވެސް ގާއިމްކޮށްފައިވެއެވެ.
ރަސްމިއްޔާތަށް ފަހުގައި ޖަޕާނުގެ ސަފީރާއި ސީޕީ ނަވީން ވަނީ އެ އުޅަނދުތައް ބައްލަވާލައްވައިފައެވެ. އެ ބޭފުޅުންނާއެކު ފުލުހުންގެ އެހެން އޮފިސަރުން ވެސް ބައިވެރިވެވަޑައިގެންނެވިއެވެ.
ފުލުހުންގެ އިދާރާއިން ވަނީ ޖަޕާނުގެ ސަރުކާރުން އުޅަނދުތައް ދެއްވުމުން ޝުކުރު އަދާކުރައްވާފައެވެ. އަދި އެ އުޅަނދުތަކުގެ ސަބަބުން ފުލުހުންގެ މަސައްކަތައްް އިތުރު ބާރެއް ލިބިގެންދާނެ ކަމަށް ވިދާޅުވިއެވެ.
