ލިވަޕޫލްގެ ކޯޗު އާނޭ ސްލޮޓް، ކްލަބަށް އަލަށް ސޮއިކުރި ކުޅުންތެރިޔާ ފްރިމްޕޯންގްގެ އަނިޔާގެ އެންމެ ފަހުގެ މައުލޫމާތުތައް ނޫސްވެރިންނަށް ދީފިއެވެ. ފްރިމްޕޯންގް ބޮޑު އަނިޔާއަކުން ސަލާމަތް ކުރެވުނުކަމަށް ސްލޮޓް ހާމަކުރިއިރު، އޭނާ މާ ގިނަ ދުވަހު ދަނޑުން ދުރުގައި ނުހުންނާނެ ކަމަށް ވަނީ އުއްމީދު ކުރެވިފައެވެ.
ސްލޮޓް ނޫސްވެރިންނާ ވާހަކަ ދައްކަމުން ވިދާޅުވީ، ލިވަޕޫލް އާއި ބޯންމައުތް ބައްދަލުކުރި މެޗުގެ 60 ވަނަ މިނިޓްގައި ފްރިމްޕޯންގް، ދަނޑުން ބާލަން މެޑިކަލް ޓީމު ދިން އިރުޝާދަކީ ވަރަށް ރަނގަޅު ނިންމުމެއްކަމަށެވެ “ސަބަބަކީ އަހަރެންނަށާއި މެޑިކަލް ސްޓާފުންނަށް ފެނުނު ގޮތުގައި ފްރިމްޕޯންގްގެ ހެމްސްޓްރިންގްގައި މައްސަލައެއް ވަނީ ފާހަގަކުރެވިފަ،” ސްލޮޓް ބުންޏެވެ.
ސްލޮޓް އިތުރަށް ބުނެފައިވަނީ، އެ މެޗުގައި ފްރިމްޕޯންގް ބޭލުމުގެ ސަބަބުން ގިނަ ބައެއްގެ ފާޑުކިޔުންތައް އޭނާއަށް އަމާޒުވި ނަމަވެސް އެކަމަކާ މާބޮޑު ފަރުވާލެއް ނެތް ކަމަށެވެ. އަދި އެގޮތަށް އެ އަމަލު ކުރެވުމުގެ ސަބަބުން ފްރިމްޕޯންގް ބޮޑު އިންޖަރީއަކުން ސަލާމަތް ކުރެވިއްޖެ ކަމަށް ވެސް އޭނާ ފާހަގަކުރިއެވެ.
މި މަގާމަށް ކުޅޭ ދެވަނަ ކުޅުންތެރިޔާ ކޮނޯ ބްރޭޑްލީ ވެސް އަނިޔާގައި ހުރި ކަމުގައިވިޔަސް، މާ ބޮޑު ހާސްކަމެއް ނެތް ކަމަށް ސްލޮޓް ބުނެފައިވެއެވެ. އަދި އެތަނަށް ކުޅުވަން އެންޑޯ ނުވަތަ ޑޮމިނިކް ސްޒޯބޮސްޒްލައި ލެވިދާނެ ކަމަށް ވެސް އޭނާ ވަނީ ފާހަގަކޮށްފައެވެ.
ފްރިމްޕޯންގްގެ އަނިޔާއާ ގުޅޭގޮތުން ސްލޮޓް ވިދާޅުވީ، ކުރިއަށް އޮތް އިންޓަނޭޝަނަލް ބްރޭކް ނިމިގެން ޕްރިމިއަރ ލީގުގެ 3 ވަނަ ބުރުގެ މެޗުތައް ފެށެންވާއިރަށް އޭނާ ރަނގަޅުވާނެ ކަމަށް އުއްމީދު ކުރެވޭ ކަމަށެވެ.
