ކުޅުދުއްފުށި ސިޓީގައި ތަރައްގީކުރުމަށް ނިންމާފައިވާ ސްޕޯޓްސް ކޮމްޕްލެކްސް ވެގެންދާނީ އެ ސިޓީގެ ތަރައްގީއަށް ލިބިގެންދާނެ ބޮޑު ކުރިއެރުމަކަށް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ދިވާޅުވެފައިވަނީ ހދ. އަތޮޅަށް ކުރައްވަމުން ގެންދަވާ ދަތުރުފުޅުގައި ކުޅުދުއްފުށި ސިޓީއަށް ޒިޔާރަތްކުރައްވައި އެ ސިޓީގެ ރައްޔިތުންނާއި ވާހަކަފުޅު ދައްކަވަމުންނެވެ.
ކުޅުދުއްފުށި ސިޓީގައި ސްޕޯޓްސް ކޮމްޕްލެކްސްއެއް ގާއިމުކުރުމަށް މިރޭ ސޮއިކޮށްފައިވާއިރު، ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވެފައިވަނީ އެ ސްޕޯޓްސް ކޮމްޕްލެކްސްގެ ސަބަބުން ކުޅުދުއްފުށި ސިޓީގެ ތަރައްގީއަށް ބޮޑު ކުރިއެރުމެއް ލިބިގެންދާނެ ކަމަށެވެ. އަދި ވަކިން ހާއްސަކޮށް ކުޅިވަރުގެ ދާއިރާއަށް އެ ސްޕޯޓްސް ކޮމްޕްލެކްސްގެ ސަބަބުން ބޮޑެތި ކުރިއެރުންތަކެއް ލިބިގެންދާނެ ކަމަށެވެ.
އެގޮތުން ސްޕޯޓްސް ކޮމްޕްލެކްސް ޑިޒައިން ކޮށްފައިވާނީ ހުރިހާ ވައްތަރެއްގެ އިންޑޯ ކުޅިވަރު ކުޅެވޭނެ ގޮތަށް ކަމުގައި ވެސް ރައީސް ވަނީ ފާހަގަ ކުރައްވާފައެވެ. އަދި އިތުރު ފެސިލިޓީތައް ވެސް ހިމެނޭނެ ކަމަށް ރައީސް ވަނީ ވިދާޅުވެފައެވެ.
އޭގެ އިތުރުން 1200 މީހުންގެ ޖާގައިގެ ކުޅިބަލާ ސަރަހައްދެއް ވެސް ހިމެނިފައިވާނެ ކަމުގައި ރައީސް ވަނީ ފާހަގަކުރައްވާފައެވެ. އަދި ރައީސް ވިދާޅުވެފައި ވަނީ ސްޕޯޓްސް ކޮމްޕްލެކްސްގެ ޑިޒައިން މާލޭގެ ސޯސަލް ސެންޓަރުގެ ކޮންސެޕްޓާ އެއްގޮތްވާނެ ކަމަށެވެ.
އިތުރަށް ރައީސް ފާހަގަކުރެއްވި ގޮތުގައި މިފަދަ ސްޕޯޓްސް ކޮމްޕްލެކްސްތައް އަޅަނީ މަދު ރައްތަކެއްގައި ކަމަށާއި، ކޮމްޕްލެކްސް އަޅަނީ އޭގެ ބޭނުން އެންމެ ބޮޑަށް އޮންނާނެ ރަށްތަކާއި ސިޓީތައް ބަލާފަ ކަމަށެވެ. އޭގެ އިތުރުން މި އަހަރުގެ ތެރޭގައި އަމަލީ މަސައްކަތް ފަށައި ބާރު ސްޕީޑުގައި ގޮސް މަސައްކަތް ނިންްމާލެވޭނެ ކަމަށް ވެސް ރައީސް ވިދާޅުވިއެވެ.
