ރައްޔިތުންގެ މަޖިލީހަށް ހުށަހަޅާފައިވާ މީޑިއާ ބިލު ދިރާސާކުރަމުންދާ މިނިވަން މުއައްސަސާތަކުގެ ކޮމިޓީން، މީޑީއާތަކާ ބައްދަލުކޮށް މަޝްވަރާ ކުރުމަށް ބައްދަލުވުމެއް ބޭއްވުމަށް ނިންމައިފި އެވެ.
މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލުގެ ނަމުގައި އެ ބިލު މަޖިލީހަށް ހުށަހެޅީ ސަރުކާރަށް އެއްބާރުލުންދޭ ތުޅާދޫ ދާއިރާގެ އަމިއްލަ މެންބަރު އަބްދުލްހަންނާނު އަބޫބަކުރެވެ. ދައުރުން ބޭއްވި މަޖިލީހުގެ އިއްޔެ ޖަލްސާގައި ވަނީ މި ބިލު ބަލައިގަނެ، ކޮމިޓީއަށް ފޮނުވާފަ އެވެ.
މި ބިލު ދިރާސާކުރަމުން އަންނަ މިނިވަން މުއައްސަސާތަކާ ބެހޭ ކޮމިޓީން މިއަދު ވަނީ މި ބިލުގެ މަސައްކަތް އަންނަ މަހުގެ 15 ގެ ކުރިން ނިންމުމަށް ފާސްކޮށްފަ އެވެ.
މަޖިލީހުގެ އިދާރާއިން ކުރި އިއުލާނުގައި ބުނީ ބިލާ ގުޅޭގޮތުން ރާއްޖޭގައި ރަޖިސްޓްރީކޮށްފައިވާ މީޑިޔާތަކާއެކު މަޝްވަރާކުުރުމަށް އަންނަ ހޯމަ ދުވަހުގެ ހެނދުނު 11 ޖަހާއިރު ބައްދަލުވުމެއް ބޭއްވުމަށް ކޮމިޓީން ނިންމާފައިވާ ކަމަށެވެ. މި ބައްދަލުވުމުގައި ކޮންމެ މީޑިއާއަކުން ވެސް ބައިވެރިވެވޭނީ އެކަކަށް ކަމަށް އިއުލާނުގައިވެ އެވެ.
ބައްދަލުވުމުގައި ބައިވެރިވާން ބޭނުންވާ ފަރާތްތަކުން ރަޖިސްޓްރޭޝަން ފޯމް އަންނަ އާދިއްތަ ދުވަހުގެ ހެނދުނު 10 ޖެހުމުގެ ކުރިން ފުރުމަށް ވަނީ އެދިފަ އެވެ.
މީޑިއާ ބިލުގައި ނޫސްވެރީންގެ ހުރި ކަންބޮޑުވުންތައް މޯލްޑިވްސް ޖާނަލިސްޓް އެސޯސިއޭޝަނުން މިއަދު ވަނީ ރައީސް ޑރ. މުހައްމަދު މުއިއްޒާއި ވެސް ހިއްސާކޮށްފަ އެވެ.
އެ ބައްދަލުވުމުގައި ރައީސް ވަނީ މިއީ މީޑިއާ ޕްރޯ ސަރުކާރެއް ކަމަށާއި ނޫސްވެރިންގެ ކަންބޮޑުވުންތައް އަބަދުވެސް އަޑުއައްސަވާނެ ކަމަށް ވިދާޅުވެފަ އެވެ. އަދި ބިލުގެ ވަކި ވަކި މާއްދާތަކުގައި ހުރި ކަންބޮޑުވުންތަކަށް ސަރުކާރުގެ ފަރާތުން އިސްލާޙް ހުށަހަޅުއްވާނެ ކަމަށްވެސް ވިދާޅުވި އެވެ.
