ހަނިމާދޫ އިންޓަރނޭޝަނަލް އެއާޕޯޓުގެ އޮޕަރޭޝަންތައް އައު ޓާމިނަލަށް ބަދަލުކޮށް ޚިދުމަތް ދޭން ފަށައިފިއެވެ.
މި ބަދަލާއެކު އެއާޕޯޓުގެ ހުރިހާ ޚިދުމަތްތަކެއް މިހާރު ދެމުން އަންނަނީ އައު ޓާމިނަލް މެދުވެރިކޮށެވެ.
އެމްއޭސީއެލްއިން ބުނި ގޮތުގައި، އޮރާޓާ ޕްރޮސެސްގެ ތެރެއިން މި މަސައްކަތް ކުރިއަށް ގެންގޮސްފައިވާއިރު، ޚިދުމަތްތައް ބަދަލުކޮށް ފަސިންޖަރުންނަށް ޚިދުމަތް ދިނުމާއި ޓާމިނަލްގެ އޮޕަރޭޝަންތައް ޗެކްކުރުމުގެ މަސައްކަތް ވަނީ ކާމިޔާބުކަމާއެކު ނިންމާފައެވެ.
އައު ޓާމިނަލްގެ އޮޕަރޭޝަންތައް ތަޖުރިބާކުރުމުގެ މަރުހަލާ ކުރިއަށްދިޔައީ ވަރަށް އަމާންކަމާއެކުކަން އެމްއޭސީއެލްއިން ފާހަގަކޮށްފައިވެއެއެވެ.
ޓާމިނަލްގެ މަސައްކަތް ބަދަލުކުރުމުގެ މައިގަނޑު ސަބަބެއްގެ ގޮތުގައި އެމްއޭސީއެލްއިން ފާހަގަކޮށްފައިވަނީ، ކޯޑް ސީގެ މަތިންދާ ބޯޓުތައް ޖެއްސުމަށްޓަކައި ރަންވޭއާ ކައިރީގައި ހުރި ކުރީގެ ޓާމިނަލް އިމާރާތާއި އެ ސަރަހައްދުގެ އުސްތަންތައް ހުސްކުރަން ޖެހުމެވެ. މި މަސައްކަތް ކުރިއަށް ގެންގޮސްފައިވަނީ ސިވިލް އޭވިއޭޝަން އޮތޯރިޓީގެ މިންގަނޑުތަކާ އެއްގޮތަށެވެ.
136.6 މިލިއަން ޑޮލަރުގެ މި މަޝްރޫއުގެ ދަށުން ތަރައްގީކޮށްފައިވާ އައު ޓާމިނަލްގައި 2465 މީޓަރުގެ ދިގު ރަންވޭއެއް ހިމެނެއެވެ. މި ރަންވޭގައި ބޮއިން 737 އާއި އެއަރބަސް ާ320 ފަދަ ކޯޑް ސީގެ އެންމެ ބޮޑެތި މަތިންދާ ބޯޓުތައް ޖެއްސޭނެއެވެ. އަދި މި އެއާޕޯޓަކީ އަހަރަކު 1.3 މިލިއަން ފަތުރުވެރިންނަށް ޚިދުމަތް ދެވޭނެ ފެންވަރުގެ އެއާޕޯޓެކެވެ.
