ޖުޑީޝަލް ސާވިސް ކޮމިޝަން (ޖޭއެސްސީ) ގެ ނައިބު ރައީސްގެ މަގާމަށް ޔަޒްމީދު މުހައްމަދު އިންތިހާބުކޮށްފިއެވެ.
ޖޭއެސްސީގެ ނައިބަކަށް ހުންނެވި ހައިކޯޓުގެ ފަނޑިޔާރު، މުހައްމަދު ނިޔާޒު ވަނީ އިއްޔެ އެ މަގާމުން އިސްތިއުފާ ދެއްވައިފައެވެ. ނިޔާޒަކީ 2022 ވަނަ އަހަރުގެ މޭމަހުގެ 11 އިން ފެށިގެން ޖޭއެސްސީގެ މެންބަރެކެވެ. އޭނާ، ޖޭއެސްސީގެ ނައިބަކަށް އައްޔަންކޮށްފައިވަނީ މިދިޔަ އަހަރުގެ މާޗު މަހުގެ 20 ވަނަ ދުވަހުގައެވެ.
ނިޔާޒު، އިސްތިއުފާ ދެއްވުމުން، އެ މަގާމަށް ޔަޒްމީދު އިންތިހާބުކޮށްފައިވަނީވެސް އިއްޔެއެވެ.
ޔަޒްމީދު، ޖޭއެސްސީގެ މެންބަރުކަމަށް އައްޔަންކުރައްވާފައިވަނީ މިއަހަރުގެ ފެބްރުއަރީމަހުގެ 23 ވަނަ ދުވަހު، ރައީސުލްޖުމްހޫރިއްޔާ އައްޔަންކުރައްވާ މެންބަރެއްގެ ހައިސިއްޔަތުންނެވެ.
ޖޭއެސްސީގައި ތިއްބަވާ 10 މެންބަރުންގެ ތެރެއިން ތިން މެންބަރުންނަކީ މަޖިލީހުން ކަނޑައަޅާ ތިން މެންބަރެކެވެ. އެއީ މަޖިލީހުގެ ރައީސާއި މަޖިލީހުން ކަނޑައަޅާ މެންބަރުގެ އިތުރުން އާންމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މެންބަރެވެ.
ދެން ޖޭއެސްސީގައި ތިއްބަވާނީ ރައީސުލްޖުމްހޫރިއްޔާ ކަނޑައަޅުއްވާ މެންބަރަކާއި، ބަންޑާރަ ނައިބާއަ، ސިވިލް ސާވިސް ކޮމިޝަން (ސީއެސްސީ) ރައީސް އަދި ވަކީލުންގެ ތެރެއިން އިންތިހާބުކުރާ މެންބަރެއްގެ އިތުރުން ތިން މަރުހަލާގެ ކޯޓުތައް ތަމްސީލުކުރަން އެ ތިން މަރުހަލާގެ ކޯޓުތަކުގެ ފަނޑިޔާރުންގެ ތެރެއިން ފަނޑިޔާރެކެވެ.
