މާލެއިން ފުރައިގެން ކާށިދުއަށް ދަތުރުކުރި ފައިސަލާ ބޯޓު ފަރަށް އަރައި، އެ ބޯޓުން ގެއްލުނު މީހާ މަރުވެފައި އޮއްވައި ފެނިއްޖެއެވެ.
ފުލުހުން މިރޭ ބުނީ ގެއްލިގެން ހޯދަމުން ދިޔަ މީހާ އެ ބޯޓް ފަރަށް އެރި ސަރަހައްދު މޫދުން ފެނިފައިވާ ކަމަށެވެ. އެ މީހާ ކާށިދޫ ހެލްތު ސެންޓަރަށް ގެންދިޔަ އިރުވެސް މަރުވެފައިވާ ކަމަށް ހެލްތު ސެންޓަރުން މައުލޫމާތު ދީފައިވާ ކަމަށެވެ.
ފުލުހުން ބުނީ މަރުވެފައިވަނީ ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގިރް (30އ.) ކަމަށެވެ.
ފުލުހުން ބުނީ ބޯޓުން 11 މީހުން ދަތުރުކުރި ކަމަށާއި އޭގެތެރެއިން 10 މީހުން ސަލާމަތް ކޮށްފައިވާ ކަމަށެވެ.
ފުލުހުން އަންނަނީ މި ހާދިސާ އިތުރަށް ތަހުގީގު ކުރަމުންނެވެ.
