މުޖުރިމު ނަތަންޔާހޫގެ މައްޗަށް ދައުވާ އުފުލާފައިވާ ކޮރަޕްޝަނާއި، ރިޝްވަތު ދިނުމާއި، ޚިޔާނާތުގެ ކުށްތަކަށް މައާފް ދިނުމަށް އެދި އެމެރިކާގެ ރައީސް ޑޮނަލްޑް ޓްރަމްޕް، އިސްރާއީލުގެ ރައީސަށް ރަސްމީކޮށް ސިޓީ ފޮނުވައިފިއެވެ.
އެމެރިކާގެ ރައީސް ޑޮނަލްޑް ޓްރަމްޕް އިސްރާއީލަށް ކުރި ދަތުރުގައި، އިސްރާއީލުގެ ޕާލަމެންޓްގައި ވާހަކަ ދައްކަމުންވެސް ވަނީ، ނަތަންޔާހޫއަށް މައާފް ދިނުމަށް ގޮވާލާފައެވެ.
އެންމެފަހުން މިވަނީ، އެކަމަށް އެދި ރަސްމީ ސިޓީއެއްވެސް ފޮނުވާފައެވެ.
އިސްރާއީލުގެ ރައީސް އިސާކް ހާރޒޮގްއަށް ފޮނުވި ސިޓީގައި ބުނެފައިވަނީ، ނަތަންޔާހޫގެ މައްޗަށް އުފުލާފައިވާ ދައުވާތަކަކީ “ސިޔާސީ ދައުވާތަކެއް ކަމަށާއި، އެއީ “ނުހައްގު” ދައުވާތަކެއް ކަމަށެވެ.
ޓްރަމްޕްގެ ސިޓީގައި ބުނެފައިވަނީ، ނަތަންޔާހޫ މަސައްކަތް ކުރަމުން ގެންދަނީ އިސްރާއީލު ސުލްހައިގެ އައްސޭރިއަކަށް ގެންދިއުމަށް ކަމަށެވެ.
އަދި ޚުދު އެނާއާއެކު ނަތަންޔާހޫ ވަރަށް ގިނަ ދުވަހު މަސައްކަތް ކޮށްފި ކަމަށާއި، އޭގެ ތެރޭގައި އީނާރާ ދެކޮޅަށް ކުރި ހަނގުރާމަވެސް ހިމެނޭ ކަމަށް ޓްރަމްޕް ބުނެފައި ވެއެވެ.
ނަތަންޔާހޫއަށް މައާފް ހޯދައި ދިނުމަށް އެމެރިކާގެ ރައީސް ޓްރަމްޕް ގަދައަޅައި މަސައްކަތް ކުރަމުން ގެންދާއިރު، ނަތަންޔާހޫއަކީ އިންޓަރނޭޝަނަލް ކްރިމިނަލް ކޯޓުން ހިފައި ހައްޔަރު ކުރުމުގެ އަމުރު ނެރެފައިވާ މީހެކެވެ.
އެއީ، އިސްތިއުމާރީ ސިފައިން ޣައްޒާއަށް ފޮނުވައި، ޣައްޒާގެ ނަސްލުނައްތާލުމުގެ ޖަރީމާ ހިންގާކަމުގެ ފުރިހަމަ ހެކި ލިބުމާ ގުޅިގެންނެވެ.
ދެއަހަރު ވަންދެން ޣައްޒާގެ އާންމުންނާ ދެކޮޅަށް ހަނގުރާމަ ކުރުމުގެ އިތުރުން، ޣައްޒާއިން ފެނާއި ކަރަންޓް ކަނޑައި، ޣައްޒާއަށް އިންސާނީ އެއްވެސް އެހީއެއް އެތެރެކުރި ނުދީ ބަންދުކުރުމަކީ ހަނގުރާމައިގެ ޖަރީމާތަކެވެ.
އދއާއި ބައިނަލްއަގްވާމީ ހުރިހާ އިދާރާތަކުން ހިންގި ތަހްގީގު ތަކަށްފަހު ބުނެފައިވަނީ، ނަތަންޔާހޫގެ އަމުރަށް ޣައްޒާގައި ހިންގަނީ ނަސްލުނައްތާލުމުގެ ޖަރީމާ ކަމަށާއި، އަދި ޣައްޒާގެ ރައްޔިތުން ބަނޑަށް މެރުމުގެ މަސައްކަތްވެސް އިސްރާއީލުން ކުރަމުން ގެންދާ ކަމަށެވެ.
މި ބޮޑު މުޖުރިމު ނަތަންޔާހޫ ސަލާމަތް ކުރެވޭތޯ އެމެރިކާގެ ރައީސް ޑޮނަލްޑް ޓްރަމްޕް މަސައްކަތް ކުރަމުން ގެންދާއިރު، ޣައްޒާގެ ރައްޔިތުންގެ ހައްގުގައި އެންމެ ބަހެއްވެސް ބުނެލަން މީނާއަށް ނުކެރެއެވެ އެހާވެސް ބޮޑަށް ހުރީ ޔަހޫދީންގެ ނުފޫޒުގެ ދަށުވެ ފިތިބާރުވެފައެވެ.
ފުރިހަމަ ހެކި ހުރެގެން ނަތަންޔާހޫ ހައްޔަރު ކުރުމުގެ އަމުރު ނެރުމުންވެސް ޓްރަމްޕަށް ގޯސްވީ ދުނިޔޭގެ ކޯޓު، އިންޓަރނޭޝަނަލް ކްރިމިނަލް ކޯޓެވެ. އަދި އިސްރާއީލާ ދެކޮޅަށް ނިންމުންތައް ނިންމުމުން ގޯސްވީ އދގެ އެންމެމަތީ ކޯޓު، އިންޓަރނޭޝަނަލް ކޯޓު އޮފް ޖަސްޓިސްއެވެ.
