ދިވެހިރާއްޖޭގެ އަޑުން އިންތިޒާމުކޮށްގެން ކުރިއަށްގެންދާ “ބެސްޓް ރޭޑިއޯ ޕްރެޒެންޓަރ ކޮންޕެޓިޝަން”، ބީއާރުޕީގެ 7 ވަނަ ސީޒަނަށް ހޮވުނު 16 ބައިވެރިންތެރޭ ހދ.ހަނިމާދޫ، ނަޔާއާބާދު، އާއިޝަތު ޢަލީޝާ ޢަލީ ހޮވިއްޖެއެވެ.
“ބެސްޓް ރޭޑިއޯ ޕްރެޒެންޓަރ ކޮންޕެޓިޝަން” އަކީ ރިއަލިޓީ ޝޯވއެކެވެ.
ބެސްޓް ރޭޑިއޯ ޕްރެޒެންޓަރ ކޮންޕެޓިޝަނަށް ހޮވުނު 16 ބައިވެރިންނަށް ޓިކެޓް ހަވާލުކޮށްފައިވާއިރު، މި މުބާރާތުގެ ޝޯތައް އަންނަ މެއިމަހުގެ 1 ވަނަ ދުވަހުން ފެށިގެން ރޭޑިއޯއާއި ޓީވީ މެދުވެރިކޮށް ގެނެސްދިނުމަށް ވަނީ ހަމަޖެހިފައެވެ. އެގޮތުން ކޮންމެ ހޮނިހިރު ދުވަހެއްގެ 14:00 ގައި ޕާފޯމަންސް ޝޯތައް ދައްކާއިރު، ބައިވެރިން މުބާރާތުން ވަކިވާ ‘އެލިމިނޭޝަން’ އޮންނާނީ ކޮންމެ ހުކުރު ދުވަހެއްގެ 14:00 ގައެވެ.
މި މުބާރާތް ކުރިއަށްދާނީ ރޭޑިއޯގެ 7 ފޯމެޓެއް ހިމެނޭ ގޮތަށް ކަމަށެވެ. އޭގެ ތެރޭގައި ރިޕޯޓް، ޚަބަރު، ވާހަކަ، އިންޓަވިއު، ލޮކޭޝަން އިންޓަވިއު، ފޯން-އިން އަދި ޑްރާމާ ފޯމެޓްތައް ހިމެނެއެވެ.
މުބާރާތުގެ ފަނޑިޔާރުންގެ ގޮތުގައި ހަރަކާތްތެރިވާނީ ދިވެހިރާއްޖޭގެ އަޑުގައި ޕްރެޒެންޓަރުންގެ ގޮތުގައި ތަފާތު އެކި މަސައްކަތްތައް ކުރައްވާފައިވާ 3 ބޭފުޅުންކަމަށްވާ ހަސަން ޙަލީމް، ނުޒުހަތު ޝަމީމް އަދި އަހުމަދު ތަލާލްއެވެ. މުބާރާތުގެ ޕްރެޒެންޓަރަކީ ގިނަ ބައެއްގެ މަޤްބޫލްކަން ލިބިފައިވާ ރޭޑިއޯ އަދި ޓީވީ ޕްރެޒެންޓަރ މިޒްނާ އަހުމަދުއެވެ.
މި މުބާރާތުގެ ތާރީޚަށް ބަލާއިރު، ފުރަތަމަ ބޭއްވީ 2016 ވަނަ އަހަރުއެވެ. މިއީ މުބާރާތުގެ 7 ވަނަ ސީޒަން ކަމަށްވާއިރު، މިހާތަނަށް ބޭއްވި 6 ސީޒަންގައިވެސް ޓައިޓްލް ކާމިޔާބުކޮށްފައިވަނީ އަންހެން ބައިވެރިންނެވެ.
މިދިޔަ އަހަރު 25 ހާސް ރުފިޔާގެ އިނާމެއް ދިން ނަމަވެސް، މި އަހަރުގެ މުބާރާތް ކާމިޔާބުކުރާ ފަރާތަކަށް ފަންސާސް ހާސް ރުފިޔާގެ ފައިސާގެ އިނާމާއި ޓްރޮފީ އަދި ކޮންޓްރެކްޓް އުސޫލުން އެއް އަހަރު ދުވަހު ދިވެހިރާއްޖޭގެ އަޑުގައި ޕްރެޒެންޓަރެއްގެ ގޮތުގައި މަސައްކަތް ކުރުމުގެ ފުރުޞަތު ދެވޭނެއެވެ. އަދި 2 ވަނައަށް ހޮވޭ ފަރާތަކަށް 25،000 ރުފިޔާ އަދި 3 ވަނަ އަށް 20،000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ.
މިއީ ރޭޑިއޯ ޕްރޮގްރާމް ހުށަހެޅުމުގެ ދާއިރާގައި މަސައްކަތް ކުރާހިތްވާ ޒުވާނުންނަށް އެފުރުޞަތު ފަހިކޮށްދީ، އެފަދަ ޒުވާނުންގެ ހުނަރު ތަރައްޤީ ކޮށްދިނުމުގެ މަޤްޞަދުގައި ކުރިއަށްގެންދާ މުބާރާތެކެވެ.
ބެސްޓް ރޭޑިއޯ ޕްރެޒެންޓަރ ކޮންޕެޓިޝަނަށް ހޮވުނު 16 ބައިވެރިން
1- އާމިނަތު ނައިޝާ މުޙައްމަދު / ރޯޝަނީގެ، ރ.އަލިފުށި
2- ނަފްޙާ ނަސީމް / އައްސޭރި، ރ.ފައިނު
3- މަރްޔަމް ޝަހާމާ / ބުލްބުލާގެ، ހއ.އިހަވަންދޫ
4- މަރްޔަމް ޝިއާނާ ސިއުތު / ގ.ޒަމްނާ، މާލެ
5- އަހުމަދު އުޝާމް / މާޖެހިގެ، ގދ.ގައްދޫ
6- މުޙައްމަދު އައިހަމް އަހުމަދު / ހ.ރީނާވިލާ، މާލެ
7- އާއިޝަތު ޢަލީޝާ ޢަލީ / ނަޔާއާބާދު، ހދ.ހަނިމާދޫ
8- ހަސަން ޙުޒާމް / ޖަންބުމާގެ، ހދ. ނޭކުރެންދޫ
9- އިޙުޝާން އަބްދުﷲ / ހަވާ، ނ.ވެލިދޫ
10- މަރްޔަމް އިމްޝާ މުޙައްމަދު / ހަޒާރުމާގެ، ނ.ވެލިދޫ
11- މަރްޔަމް ޘާނީ / އަންނާރުމާގެ، ށ.މިލަންދޫ
12- ޙައްވާ ޝީން އަޙްމަދު / ފިނިފެންޖަންބުގެ، ގއ.ވިލިނގިލި
13- އާމިނަތު ޝެހެނާޒް / މ.ފެހިގިލި، މާލެ
14- ޙުސައިން ރަޝީދު / އަތިރީގެ، އއ.މަތިވެރި
15- މަރްޔަމް އަލީ / އެއްގަމުގެ، ރ.ވާދޫ
16- މުޙައްމަދު ނާޒިޙް / ޖޭމުގަސްދޮށުގެ، ހއ.ކެލާ
