ހަނިމާދޫގެ ކުޑަކުދިންގެ ޕާކުތަކާއި އާންމު މައިޒާންތަކަށް ބޭނުންވާ ސާމާނު ސަޕްލައިކޮށް، އިންސްޓޯލްކޮށްދޭނެ ފަރާތެއް ހޯދުމަށް ކުރި އިޢުލާނާ ގުޅިގެން، މިނެޓް ޕްލަސް ޕްރައިވެޓް ލިމިޓެޑާއެކު މިއަދު ރަސްމީކޮށް އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގައި ހަނިމާދޫ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސެވެ. އަދި މިނެޓް ޕްލަސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އާދަމް އެވެ.
މި މަޝްރޫޢަކީ ޖުމްލަ 2،774،736.00 (ދެ މިލިއަން ހަތް ލައްކަ ހަތްދިހަ ހަތަރު ހާސް ހަތްސަތޭކަ ތިރީސް ހަ) ރުފިޔާގެ މަޝްރޫޢެކެވެ. މި މަސައްކަތް ހަވާލުކޮށްފައިވަނީ 120 ދުވަހުގެ ތެރޭގައި ނިންމާ ގޮތަށެވެ.
މަޝްރޫޢުގެ ތަފްސީލު:
މި މަޝްރޫޢުގެ ދަށުން ހަނިމާދޫގައި މިހާރު ހުރި ޕާކުތަކާއި އަލަށް ތަރައްޤީކުރާ ސަރަޙައްދުތަކުގެ ފެންވަރު މަތިކުރުމަށް ގިނަ މަސައްކަތްތަކެއް ކުރުމަށް ވަނީ ހަމަޖެހިފައެވެ.
މި މަޝްރޫޢުގެ ދަށުން ކުރަން ނިންމާފައިވާ މުހިންމު މަސައްކަތްތައް:
* ކުޅޭ ސާމާނު ފޯރުކޮށްދިނުން: ކުޑަކުދިންނަށް ރައްކާތެރި، ޒަމާނީ ފެންވަރުގެ ކުޅޭ ސާމާނު ސަޕްލައިކުރުން.
* އިންސްޓޯލްކުރުން: ފޯރުކޮށްދޭ ތަކެތި ރައްކާތެރިކަމާއެކު ޕާކުތަކުގައި ހަރުކޮށް، އިންސްޓޯލްކުރުން.
* އާންމު ވަސީލަތްތައް: ޕާކުތަކުގައި އިށީންނާނެ ބެންޗުތަކާއި، ބޭނުންވާ އަލިކުރުމުގެ ނިޒާމު ޤާއިމުކުރުން.
* ކުލަ ޕާކް ތަރައްޤީކުރުން: ކުލަ ޕާކުގައި ޓާފް އެޅުމާއި، ޑަސްބިން ބެހެއްޓުމުގެ އިތުރުން ބެންޗުތައް ޤާއިމުކުރުން.
* ދާއިރާ ފުޅާކުރުން: ރަށުގެ އެކި ސަރަޙައްދުތަކުގައި 4 ޕާކެއް ތަރައްޤީކުރުމާއި، އިތުރު މައިޒާންތަކުގެ އިތުރުން ސްކޫލަށް ބޭނުންވާ ކުޅޭ ސާމާނު ފޯރުކޮށްދިނުންވެސް މި މަޝްރޫޢުގެ ތެރޭގައި ހިމެނެއެވެ.
ހަނިމާދޫ ކައުންސިލުން ހާމަކުރެއްވި ގޮތުގައި، މި މަޝްރޫޢުގެ މައިގަނޑު މަޤްޞަދަކީ އެ ރަށުގެ ކުޑަކުދިންނާއި އާއިލާތަކަށް އުފާވެރިކަމާއި ރައްކާތެރިކަން ލިބިގެންވާ، ހިތްފަސޭހަ މާޙައުލެއް ބިނާކުރުމެވެ. މީގެ އިތުރުން، މިނެޓް ޕްލަސް ފަދަ ޤާބިލު ކުންފުންޏަކާ މިއަދު ހަވާލުކުރެވުނު މި މަސައްކަތް، ކަނޑައެޅިފައިވާ ތާވަލާ އެއްގޮތަށް ނިންމައި، އާންމުންނަށް އޭގެ މަންފާ ލިބިގެންދާނެ ކަމަށް ކައުންސިލުން ޔަގީންކުރެއެވެ.
