ޕާކުތަކާއި މައިޒާންތައް ބަންދުކުރުން ނިންމި ނިންމުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބާތިލްކޮށްފި އެވެ.
އެޗްޕީއޭއިން ގެޖެޓްކޮށްފައިވާ އިއުލާންގައި ބުނެފައިވަނީ ޑިރެކްޓަރ ޖެނެރަލް އޮފް ޕަބްލިކް ހެލްތުގެ ހައިސިއްޔަތުން ލިބިދޭ ބާރުގެ ދަށުން، 2021 މާރިޗު 4 ވީ ބުރާސްފަތި ދުވަހު އަންގައިފައިވާ އެންގުމުގައި 7 (ހަތެއް) ދުވަހުގެ މުއްދަތަށް އެޅުމަށް ނިންމައިފައިވާ ފިޔަވަޅުތަކުގެ 5 ވަނަ ނަންބަރު ބަތިލްކުރާކަމަށެވެ. އެ ނަމްބަރަކީ ޕާކުތަކާއި މައިޒާންތައް ބަންދުކުރުން އެންގި އެންގުމެވެ.
އެ ނަމްބަރު ބާތިލްކުރުމާއެކު ޕާކުތަކާއި މައިޒާންތައް ހުޅުވާލަންޖެހޭނެ އެވެ.
އިއުލާންގައި އިތުރަށް ބުނީ ޕާކުތަކާއި މައިޒާންތައް ބަންދުކުރަން އެންގި ނަމްބަރު ބާތިލުކޮށް، އެ އެންގުމުގައި 7 (ހަތެއް) ދުވަހުގެ މުއްދަތަށް އެޅުމަށް ނިންމައިފައިވާ އެހެނިހެން ފިޔަވަޅުތަކުގެ މުއްދަތު، 2021 މާރިޗު 25 އިން ފެށިގެން 7 (ހަތެއް) ދުވަހުގެ މުއްދަތަށް، އިތުރުކުރުމަށް ނިންމާފައިވާކަމަށެވެ.
ހަތް ދުވަހަށް އިތުރުކުރި ފިޔަވަޅުތައް:
- ރޭގަނޑު 11:00 އިން ފެށިގެން ފަތިހު 4:30 އަށް، މަގުމައްޗާއި އާންމު ތަންތަނަށް މީހުން ނުކުތުން މަނާކުރުން.
- އެއްފަހަރާ 5 (ފަހެއް) މީހުންނަށްވުރެ ގިނަމީހުން، މަގުމައްޗާއި އާންމު ތަންތަނަށް އެއްވެއުޅުން ހުއްޓައިލުން.
- ސިނަމާތަކާއި ފިލްމު ތިއޭޓަރުތައް ހިންގުން ހުއްޓައިލުން.
- ދުވުމަށް ޚާއްޞަކޮށްފައިވާ ޓްރެކުތައް ބަންދުކުރުން.
- ޔުނިވަރސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކުލާސްތައް ކުރިޔަށް ގެންދިޔުން ހުއްޓައިލުން.
- އެކަނި ކުރާ ކަސްރަތުތައް ފިޔަވައި، ކުޅިވަރު ހަރަކާތްތަކާއި ކަސްރަތުގެ ހަރަކާތްތައް ހުއްޓައިލުން.


