ޔުނައިޓެޑާއި އާސެނަލް ސެމީއަށް

ކުޅިވަރު ފަހުގެ

ޔުއެފާ ޔޫރޮޕާ ލީގުގެ ސެމީ ފައިނަލަށް މެންޗެސްޓާ ޔުނައިޓެޑާއި އާސެނަލް ދަތުރުކޮށްފިއެވެ.

ސެމީގެ ޖާގައެއް ޔުނައިޓެޑް ހޯދީ ކުއާޓާ ފައިނަލުގައި ގްރާނާޑާ އަތުން 4-0 ގެ އެގްރިގޭޓް ނަތީޖާއަކުން މޮޅުވެގެންނެވެ. އެގޮތުން ބުރާސްފަތި ދުވަހުގެރޭ އަމިއްލަ ދަނޑުގައި ކުޅުނު ދެވަނަ ލެގުން 2-0 ގެ ނަތީޖާއަކުން ޔުނައިޓެޑް މޮޅުވިއިރު، ރަށުން ބޭރުގައި ކުޅުނު ފުރަތަމަ ލެގުންވެސް ޔުނައިޓެޑް ވަނީ 2-0 ގެ ނަތީޖާއަކުން މޮޅުވެފައެވެ.

އިޝްތިހާރު ޖެއްސެވުމަށް ގުޅުއްވާ

ބުރާސްފަތި ދުވަހުގެރޭ ކުޅުނު މެޗުގައި ޔުނައިޓެޑުން މޮޅު ކުޅުމެއް ދެއްކިއިރު، މި މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. އެގޮތުން މެޗު ފަށައިގެން ހަވަނަ މިނެޓުގައި މި ލަނޑު ޔުނައިޓެޑަށް ކާމިޔާބުކޮށްދިނީ އެޑިންސަން ކަވާނީއެވެ. އޭގެ ފަހުން މި މެޗުގައި ލަނޑު ޖަހަން ދެ ޓީމަށްވެސް ރަނގަޅު ފުރުޞަތުތަކެއް ލިބިގެންދިޔައިރު، ޔުނައިޓެޑުން ލީޑު ފުޅާކޮށްފައިވަނީ މެޗުގެ އިތުރު ވަގުތުގައެވެ. މި ލަނޑު އެ ޓީމަށް ކާމިޔާބުކޮށްދިނީ ހެސޫސް ވަޔޭހޯއެވެ.

މި މެޗުން ޔުނައިޓެޑް މޮޅުވިއިރު، ޔޫރޮޕާ ލީގުގައި އަމިއްލަ ދަނޑުގައި އެންމެ ފަހުން ކުޅުނު 17 މެޗުންވެސް ޔުނައިޓެޑް ބަލިވެފައެއް ނުވެއެވެ. އަދި މި ނަތީޖާއާއެކު ސެމީއަށް ޔުނައިޓެޑް ދަތުރުކުރިއިރު، ސެމީގައި އެ ޓީމު ބައްދަލުކުރަން ޖެހޭނީ ރޯމާއާއެވެ. ސެމީގެ ޖާގައެއް ރޯމާއިން ހޯދީ އަޔަކްސް އަތުން 3-2 ގެ އެގްރިގޭޓް ނަތީޖާއަކުން މޮޅުވެގެންނެވެ.

މީގެ އިތުރުން މި މުބާރާތުގެ ސެމީއަށް އާސެނަލް ދަތުރުކުރީ ކުއާޓާގައި ސްލާވިއާ ޕްރާގް އަތުން 5-1 ގެ އެގްރިގޭޓް ނަތީޖާއަކުން މޮޅުވެގެންނެވެ. އެގޮތުން އަމިއްލަ ދަނޑުގައި ކުޅުނު ފުރަތަމަ ލެގުން އާސެނަލާއި ސްލާވިއާ ޕްރާގް 1-1 ގެ ނަތީޖާއަކުން އެއްވަރުވި ނަމަވެސް، ބުރާސްފަތި ދުވަހުގެރޭ ރަށުން ބޭރުގައި ކުޅުނު ދެވަނަ ލެގުން އާސެނަލް ވަނީ 4-0 ގެ ނަތީޖާއަކުން މޮޅުވެފައެވެ.

PRAGUE, CZECH REPUBLIC – APRIL 15: Bukayo Saka of Arsenal (hidden) celebrates with teammates after scoring their team’s third goal during the UEFA Europa League Quarter Final Second Leg match between Slavia Praha and Arsenal FC at Eden Arena on April 15, 2021 in Prague, Czech Republic. Sporting stadiums around Europe remain under strict restrictions due to the Coronavirus Pandemic as Government social distancing laws prohibit fans inside venues resulting in games being played behind closed doors. (Photo by Martin Sidorjak/Getty Images)

ބުރާސްފަތި ދުވަހުގެރޭ ކުޅުނު މެޗުގައި އާސެނަލުން މޮޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ތިން ލަނޑު ޖަހާފައެވެ. އެގޮތުން މެޗުގެ 18 ވަނަ މިނެޓުގައި ނިކޮލަސް ޕެޕޭ އާސެނަލަށް ލީޑު ނަގައިދިންއިރު، އޭގެ ތިން މިނެޓު ފަހުން ލިބުނު ޕެނަލްޓީއަކުން އެލެކްޒެންޑަ ލަކަޒޭޓް ވަނީ އެ ޓީމަށް ލީޑު ފުޅާކޮށްދީފައެވެ. އަދި އޭގެ ތިން މިނެޓު ފަހުން އާސެނަލުގެ ތިންވަނަ ލަނޑު ކާމިޔާބުކޮށްދިނީ ބުކާޔޯ ސަކާއެވެ. ދެން މި މެޗުގައި އާސެނަލުން ޖެހި ހަތަރުވަނަ ލަނޑު، މެޗުގެ 77 ވަނަ މިނެޓުގައި ކާމިޔާބުކޮށްދިނީ ލަކަޒޭޓެވެ.

މި މޮޅާއެކު ޔޫރޮޕާ ލީގުގެ ސެމީއަށް އާސެނަލް ދަތުރުކުރިއިރު، މިއީ ޔޫރަޕް މުބާރާތެއްގެ ސެމީން އާސެނަލް ޖާގަ ހޯދި 10 ވަނަ ފަހަރެވެ. ސެމީގެ މެޗުތައް މި މަހުގެ ފަހުކޮޅު ފަށާއިރު، ސެމީގައި އާސެނަލް ބައްދަލުކުރަން ޖެހޭނީ ވިޔަރެއާލާއެވެ. ސެމީއަށް ވިޔަރެއާލް ދަތުރުކޮށްފައިވަނީ ޑީނަމޯ ޒެގްރެބް 3-1 ގެ އެގްރިގޭޓް ނަތީޖާއަކުން މޮޅުވެގެންނެވެ.

އިޝްތިހާރު
އިޝްތިހާރު

ޚިޔާލު ފާޅުކުރައްވާ